Poslovne vijesti - Makedonija

Ќе градиме инфраструктурни објекти со кинески кредити

Македонија ќе земе кредити од кинеската Експорт-импорт банка за да изгради автопати, магистрални патишта, железнички пруги, мостови, електроенергетски и телекомуникациски објекти.

За таа цел, вчера во Скопје беше потпишан меѓудржавен договор меѓу министерот за транспорт и врски, Миле Јанакиески и кинескиот амбасадор во земјава, Цуј Џивеи.

- Со Договорот се дава приоритет на изградбата на автопатска делница Миладиновци - Штип за кој веќе е изготвен финален проект и е почнат процес за експропријација. На ниво на автопат ќе биде и патот Кичево - Охрид, за кој исто така веќе се изготвени проекти, а за патот Охрид - Св. Наум Агенцијата за државни патишта во наредните две години треба да изготви проектна документација - истакна Јанакиески.

За финансирање на делниците се планира да се искористат дел од 10 милијарди евра што ги најави кинеската влада за развој на Југоисточна Европа, со кредитирање преку Експорт-импорт банка.

- За патот Миладиновци - Штип нашата тенденција е да искористиме дел од тие 10 милијарди евра, а во иднина можеби ќе има и други поповолни линии или друг начин на финансирање. Во конкретниот случај за тие 10 милијарди евра се работи за многу поволно кредитирање од кинеската Ексим банка - појасни Јанакиески.

Тој укажа дека Владата сака да се реализираат сите приорити, но мора да се исполнат сите услови во согласност со Стратегијата за надворешниот долг, капацитетот на двете држави и сите останати мерки што ќе бидат преземени во иднина.

- Македонија е во границата на ниско задолжени земји, но сепак треба да се почитува Стратегијата за надворешниот долг во РМ при евентуални кредити за изградба на инфраструктурата. Но, овие проекти се наш приоритет и во соработка со Министерството за финансии и вицепремиерот за економски прашања Владимир Пешевски ќе утврдиме динамика, бидејќи паралелно Министерството за транспорт и врски со Министерството за финансии работи и на обезбедување средства за изградба на Коридорот 8 кон Бугарија и за гасификацискиот систем - појасни Јанакиески.